Flirta

Neilich be i mit meinere Fraindin in einem Single-Lokal
gwäsa. Mei Fraindin ischt nähmlich ein überzeugter
Single. Bloss an Weihnachta, Oschtra und an Sylveschter
kriegt se s’heulende Elend. Aber sonscht ischt se ganz
fit in Ällem, was Kontakteschliessa abelangt. Do ka i
no ebbes lerna.

Mir send also in des Lokal - noi,noi i sag eich et wie
des hoisst, sonscht send ihr womeglich morga älle dort
- do han i nex dümmers zum do, als an en Tisch
nozumsitza. No hot me d’Freindin erscht aufklära müssa,
dass mer am Tisch koi Chance hot. Mer schtoht an d’Bar.
Und des au et irgendwo, sondern ma schtoht visavie vom
Eigang. Ond dann natierlich et so verkrampft, sondern
locker. Wenn die Plätz b’setzt send, no schtoht ma am
beschta do, wo’s zom Klo goht. - Et dass ma schnell
beim Piesla ischt, wenn oim so an Blick en de Ranza
fährt, noi, s’goht drom, dass ma gsea wird.
Schliesslich kommt jeder am Obend a paarmol vorbei. -
No tut ma so, als wär ma zufällig ausnahmsweis bloss
heit Obend do, weil mer hot’s jo et naitig. Richtig
Cool muss ma ausseha, des megat d’Männer.

No ischt also so a Ma, auf den mei Fraindin scharf gwea
isch, ganz locker ond cool in Richtung Pissoir ganga,
do sproizt se ganz elegant den Fuss mit ihrem naia
Pumps a bissle ab. „Hoppla“ sagt se ganz scheihoilig
und lachelt was des rote Göschle hergibt. Er
entschuldigt sich und schtreichelt se am Arm, scho
ischt der Kontakt hergschtellt.

Ha was die ka, ka i scho lang, denk i mir und
tatsächlich kommt a schtattlicher Ma in Richtung Klo
gschossa. Auu war der schee. Mir isch’s Zäpfle na wie
nix. I schtreck mein Fuß naus und klammer me ganz cool
am Tresa fescht.- Der Länge nach hot’s ihn
na’gschtreckt. „Hoppla!“ sag i, wie er wieder hochkommt
ond setz mei schenschtes Lächla auf. „Des ischt mir
aber arg...“. Do seh i, wie des rot von seine Ohrlappa
sich über s’ganze G’sicht verteilt. „Kannsch et
aufpassa, du blede Goiss?“, brüllt der me a. I ben aus
älle Wolka g’falla. Des ganze Lokal hot guckt, bloss
weil der Depp dui Schpielregel et kennt und auf d’Gosch
gfalla isch. Der Obend war versaut. Ond vom Single
Dasein han i d’Schnauze vollghet.
Reumietig be i hoim zu meim Ma und han denkt: „Der
siebte Himmel isch’s zwar nemme, aber mer woiss, was
mer an em hot.“

Zurück